हरिः ओम्

Sloka Text in Telugu , Kannada, Gujarati, Devanagari, English

|| Om tat sat ||

ಸುಂದರಕಾಂಡ.
ಅಥ ಅಷ್ಟಾದಶಸ್ಸರ್ಗಃ

ಶ್ಲೋ||ತಥಾ ವಿಪ್ರೇಕ್ಷಮಾನಸ್ಯ ವನಂ ಪುಷ್ಪಿತ ಪಾದಪಂ|
ವಿಚಿನ್ವತಶ್ಚ ವೈದೇಹೀಂ ಕಿಂಚಿತ್ ಶೇಷಾ ನಿಶಾಽಭವತ್||1||

ಷಡಙ್ಗವೇದವಿದುಷಾಂ ಕ್ರತುಪ್ರವರಯಾಜಿನಾಂ|
ಶುಶ್ರಾವ ಬ್ರಹ್ಮಘೋಷಾಂಶ್ಚ ವಿರಾತ್ರೇ ಬ್ರಹ್ಮರಕ್ಷಸಾಮ್||2||
ಅಥಮಙ್ಗಳವಾದಿತ್ರೈಃ ಶಬ್ದೈಃ ಶ್ರೋತ್ರಮನೋಹರೈಃ|
ಪ್ರಾಬುಧ್ಯತ ಮಹಾಬಾಹುಃ ದಶಗ್ರೀವೋ ಮಹಾಬಲಃ||3||

ವಿಬುಧ್ಯತು ಯಥಾಕಾಲಂ ರಾಕ್ಷಸೇನ್ದ್ರಃ ಪ್ರತಾಪವಾನ್|
ಸ್ರಸ್ತಮಾಲ್ಯಾಮ್ಬರಧರೋ ವೈದೇಹೀಮ್ ಅನ್ವಚಿನ್ತಯತ್||4||
ಭೃಶಂ ನಿಯುಕ್ತಸ್ತಸ್ಯಾಂ ಚ ಮದನೇನ ಮದೋತ್ಕಟಾಃ|
ನ ಸ ತಂ ರಾಕ್ಷಸಂ ಕಾಮಂ ಶಶಾಕಾತ್ಮನಿ ಗೂಹಿತಮ್||5||

ಸ ಸರ್ವಾಭರಣೈರ್ಯುಕ್ತೋ ಬಿಭ್ರತ್ ಶ್ರಿಯಮನುತ್ತಮಾಂ|
ತಾಂ ನಗೈರ್ಬಹುಭಿ ರ್ಜುಷ್ಟಾಂ ಸರ್ವಪುಷ್ಪಫಲೋಪಗೈಃ||6||
ವೃತಾಂ ಪುಷ್ಕರಿಣೀಭಿಶ್ಚನಾನಾಪುಷ್ಪೋಪಶೋಭಿತಾಮ್|
ಸದಾಮದೈಶ್ಚ ವಿಹಗೈಃ ವಿಚಿತ್ರಾಂ ಪರಮಾದ್ಭುತಮ್||7||

ಈಹಾಮೃಗೈಶ್ಚ ವಿವಿಧೈರ್ಜುಷ್ಟಾಂ ದೃಷ್ಟಿಮನೋಹರೈಃ|
ವೀಥೀಃ ಸಂಪ್ರೇಕ್ಷಮಾಣಶ್ಚ ಮಣಿಕಾಞ್ಚನತೋರಣಾಃ||8||
ನಾನಾಮೃಗ ಗಣಾಕೀರ್ಣಮ್ ಫಲೈಃ ಪ್ರಪತಿತೈರ್ವೃತಾಮ್|
ಅಶೋಕವನಿಕಾಮೇವ ಪ್ರಾವಿಶತ್ ಸಂತತದ್ರುಮಾಮ್||9||

ಅಙ್ಗನಾಶತಮಾತ್ರಂತು ತಂ ವ್ರಜಂತ ಮನುವ್ರಜತ್|
ಮಹೇನ್ದ್ರಮಿವ ಪೌಲಸ್ತ್ಯಂ ದೇವಗಂಧರ್ವಯೋಷಿತಃ||10||
ದೀಪಿಕಾಃ ಕಾಞ್ಚನೀಃ ಕಾಶ್ಚಿತ್ ಜಗೃಹುಃ ತತ್ರ ಯೋಷಿತಃ|
ವಾಲವ್ಯಜನಹಸ್ತಾಶ್ಚ ತಾಲವೃನ್ತಾನಿ ಚಾಪರಾಃ||11||
ಕಾಞ್ಚನೈರಪಿ ಭೃಂಗಾರೈಃ ಜಹ್ರುಃ ಸಲಿಲಮಗ್ರತಃ||
ಮಣ್ಡಲಾಗ್ರಾನ್ ಬೃಸೀಂಚೈವ ಗೃಹ್ಯಾಽನ್ಯಾಃ ಪೃಷ್ಠತೋ ಯಯುಃ||12||
ಕಾಚಿತ್ ರತ್ನಮಯೀಂ ಸ್ಥಾಲೀಂ ಪೂರ್ಣಾಂ ಪಾನಸ್ಯ ಭಾಮಿನೀ|
ದಕ್ಷಿಣಾ ದಕ್ಷಿಣೇನೈವ ತದಾ ಜಗ್ರಾಹ ಪಾಣಿನಾ||13||

ರಾಜಹಂಸ ಪ್ರತೀಕಾಶಂ ಛತ್ರಂ ಪೂರ್ಣಶಶಿಪ್ರಭಮ್|
ಸೌವರ್ಣದಣ್ಡಮಪರಾ ಗೃಹೀತ್ವಾ ಪೃಷ್ಠತೋ ಯಯೌ||14||

ನಿದ್ರಾಮದ ಪರೀತಾಕ್ಷ್ಯೋ ರಾವಣಸ್ಯೋತ್ತಮಾಃ ಸ್ತ್ರಿಯಃ|
ಅನುಜಗ್ಮುಃ ಪತಿಂ ವೀರಂ ಘನಂ ವಿದ್ಯುಲ್ಲತಾಇವ||15||
ವ್ಯಾವಿದ್ಧಹಾರಕೇಯೂರಾಃ ಸಮಾ ಮೃದಿತವರ್ಣಕಾಃ|
ಸಮಾಗಳಿತ ಕೇಶಾನ್ತಾಃ ಸಸ್ವೇದ ವದನಾಸ್ತಥಾ||16||

ಘೂರ್ಣಂತ್ಯೋ ಮದಶೇಷೇಣ ನಿದ್ರಯಾ ಚ ಶುಭಾನನಾಃ|
ಸ್ವೇದಕ್ಲಿಷ್ಟಾಙ್ಗ ಕುಸುಮಾಃ ಸುಮಾಲ್ಯಾಕುಲಮೂರ್ಥಜಾಃ||17||
ಪ್ರಯಾನ್ತಂ ನೈರೃತಪತಿಂ ನಾರ್ಯೋ ಮದಿರಲೋಚನಾಃ|
ಬಹುಮಾನಾಚ್ಚ ಕಾಮಾಚ್ಚ ಪ್ರಿಯಾ ಭಾರ್ಯಾ ಸ್ತಮನ್ವಯುಃ||18||

ಸ ಚ ಕಾಮಪರಾಧೀನಃ ಪತಿ ಸ್ತಾಸಾಂ ಮಹಾಬಲಃ|
ಸೀತಾಸಕ್ತ ಮನಾ ಮಮ್ದೋ ಮದಾಞ್ಚಿತಗತಿ ರ್ಬಭೌ||19||
ತತಃ ಕಾಞ್ಚೀನಿನಾದಂ ಚ ನೂಪುರಾಣಾಂ ನಿಸ್ಸ್ವನಮ್|
ಶುಶ್ರಾವ ಪರಮಸ್ತ್ರೀಣಾಂ ಸ ಕಪಿರ್ಮಾರುತಾತ್ಮಜಃ||20||

ತಂ ಚಾ ಪ್ರತಿಮಕರ್ಮಾಣಂ ಅಚಿನ್ತ್ಯಬಲಪೌರುಷಮ್|
ದ್ವಾರದೇಶಮನುಪ್ರಾಪ್ತಂ ದದರ್ಶ ಹನುಮಾನ್ ಕಪಿಃ||21||
ದೀಪಿಕಾಭಿರನೇಕಾಭಿಃ ಸಮನ್ತಾದವಭಾಸಿತಮ್|
ಗನ್ಧತೈಲಾವಸಿಕ್ತಾಭಿಃ ಧ್ರಿಯಮಾಣಾಭಿರಗ್ರತಃ||22||
ಕಾಮದರ್ಪಮದೈರ್ಯುತಂ ಜಿಹ್ಮತಾಮ್ರಾಯತೇಕ್ಷಣಮ್|
ಸಮಕ್ಷಮಿವ ಕಂದರ್ಪಂ ಅಪವಿದ್ಧಶರಾಸನಮ್||23||
ಮಥಿತಾಮೃತಫೇನಾಭ ಮರಜೋ ವಸ್ತ್ರಮುತ್ತಮಮ್|
ಸಲೀಲ ಮನುಕರ್ಷಂತಂ ವಿಮುಕ್ತಂ ಸಕ್ತ ಮಂಗದೇ ||24||

ತಂ ಪತ್ರವಿಟಪೇ ಲೀನಃ ಪತ್ತ್ರಪುಷ್ಪಘನಾವೃತಃ|
ಸಮೀಪಮಿವ ಸಂಕ್ರಾನ್ತಂ ನಿಧ್ಯಾತು ಮುಪಚಕ್ರಮೇ||25||
ಅವೇಕ್ಷಮಾಣಸ್ತು ತತೋ ದದರ್ಶ ಕಪಿಕುಙ್ಜರಃ |
ರೂಪಯೌವನಸಂಪನ್ನಾ ರಾವಣಸ್ಯ ವರಸ್ತ್ರಿಯಃ||26||

ತಾಭಿಃ ಪರಿವೃತೋ ರಾಜಾ ಸುರೂಪಾಭಿರ್ಮಹಾಯಶಾಃ|
ತನ್ಮೃಗದ್ವಿಜಸಂಘುಷ್ಟಂ ಪ್ರವಿಷ್ಟಃ ಪ್ರಮದಾವನಮ್||27||
ಕ್ಷೀಬೋ ವಿಚಿತ್ರಾಭರಣಃ ಶಂಙ್ಕುಕರ್ಣೋ ಮಹಾಬಲಃ|
ತೇನ ವಿಶ್ರವಸಃ ಪುತ್ತ್ರಃ ಸದೃಷ್ಟೋ ರಾಕ್ಷಸಾಧಿಪಃ||28||
ವೃತಃ ಪರಮನಾರೀಭಿಃ ತಾರಾಭಿರಿವ ಚನ್ದ್ರಮಾಃ|
ತಂ ದದರ್ಶ ಮಹಾತೇಜಾಃ ತೇಜೋವನ್ತಂ ಮಹಾಕಪಿಃ||29||

ರಾವಣೋಽಯಂ ಮಹಾಬಾಹುಃ ಇತಿ ಸಂಚಿತ್ಯ ವಾನರಃ|
ಅವಪ್ಲುತೋ ಮಹಾತೇಜಾ ಹನುಮಾನ್ ಮಾರುತಾತ್ಮಜಃ||30||
ಸ ತಥಾ‍ಪ್ಯುಗ್ರತೇಜಾಃ ಸನ್ನಿರ್ಧೂತಸ್ತಸ್ಯ ತೇಜಸಾ|
ಪತ್ರಗುಹ್ಯಾನ್ತರೇ ಸಕ್ತೋ ಹಾನುಮಾನ್ ಸಂವೃತೋಽಭವತ್||31||

ಸ ತಾಂ ಅಸಿತಕೇಶಾಂತಾಂ ಸುಶ್ರೋಣೀಂ ಸಂಹತಸ್ತನೀಮ್|
ದಿದೃಕ್ಷು ರಸಿತಾಪಾಂಗಾಂ ಉಪಾವರ್ತತ ರಾವಣಃ||32||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಅಷ್ಟಾದಶಸ್ಸರ್ಗಃ||

|| ಓಮ್ ತತ್ ಸತ್ ||